عام آدمی پارٹی لیڈر امانت اللہ خان کے گھر پہنچی نوئیڈا پولیس، اس معاملہ میں باپ بیٹے کی تلاش، دروازہ پر لگایا نوٹس

عام آدمی پارٹی لیڈر امانت اللہ خان کے گھر پہنچی نوئیڈا پولیس، اس معاملہ میں باپ بیٹے کی تلاش، دروازہ پر لگایا نوٹس

عام آدمی پارٹی کے ایم ایل اے امانت اللہ خان ایک بار پھر تنازعات اور مشکلات میں پھنستے نظر آرہے ہیں۔ نوئیڈا پولیس کو پٹرول پمپ کے ملازم پر حملہ کے معاملے میں ایم ایل اے اور ان کے بیٹے کی تلاش ہے۔

نئی دہلی : عام آدمی پارٹی کے ایم ایل اے امانت اللہ خان ایک بار پھر تنازعات اور مشکلات میں پھنستے نظر آرہے ہیں۔ نوئیڈا پولیس کو پٹرول پمپ کے ملازم پر حملہ کے معاملے میں ایم ایل اے اور ان کے بیٹے کی تلاش ہے۔ آج اس سلسلے میں نوئیڈا پولیس اے اے پی ایم ایل اے خان کے گھر پہنچی تھی۔ نوئیڈا پولیس امانت اللہ خان کو نوٹس دینے ان کے گھر پہنچی تھی۔ لیکن ایم ایل اے اپنے بیٹے کے ساتھ کئی دنوں سے گھر سے غائب ہیں۔ اس کے بعد نوئیڈا پولیس نے اے اے پی ایم ایل اے کے گھر پر نوٹس چسپاں کر دیا۔ نوئیڈا پولیس کا الزام ہے کہ امانت اللہ خان اور ان کے بیٹے تحقیقات میں تعاون نہیں کر رہے ہیں۔

نوئیڈا پولیس نے ایم ایل اے امانت اللہ خان اور ان کے بیٹے کے خلاف ایف آئی آر درج کی ہے۔ ایم ایل اے امانت اللہ خان کے بیٹے پر پٹرول پمپ کے ملازم پر حملہ کرنے کا الزام ہے جبکہ ایم ایل اے خان پر دھمکیاں دینے کا الزام ہے۔ نوئیڈا پولیس کے مطابق دونوں باپ بیٹا غائب ہیں، ہماری تلاش جاری ہے۔ قابل ذکر ہے کہ پٹرول پمپ پر ہنگامہ آرائی کے معاملے میں ایف آئی آر درج ہونے کے بعد عام آدمی پارٹی کے ایم ایل اے امانت اللہ خان اور ان کے بیٹے انس پولیس جانچ میں تعاون نہیں کر رہے ہیں۔

نوئیڈا پولیس اس بات کا بھی پتہ لگا رہی ہے کہ امانت اللہ کو کن انتخابی پروگراموں میں اور کہاں کہاں شرکت کرنی ہے۔ اطلاعات موصول ہوئی ہیں کہ امانت اللہ ان پروگراموں میں شرکت نہیں کر رہے جن میں انہیں شرکت کرنی تھی۔ اس دوران نوئیڈا پولیس نے اب تک پٹرول پمپ پر حملہ کے معاملے میں سی سی ٹی وی اور گواہوں کے بیانات اکٹھے کیے ہیں۔ اس کی جانچ بھی کرلی گئی ہے۔