مالیگاؤں : جنتادل سیکولر ورکروں کی ہنگامی میٹنگ

مالیگاؤں : جنتادل سیکولر ورکروں کی ہنگامی میٹنگ

مالیگاؤں (پریس ریلیز) مالیگاؤں شہر روز اول سے فرقہ پرستی کا مخالف رہا ہے. اس شہر نے نہ کبھی فرقہ پرستی کو برداشت کیا نہ فرقہ پرستوں کا کبھی ساتھ دیا. شہر کی گُھٹّی میں غیر فرقہ پرستی کوٹ کوٹ کر بھری ہے. اس کی سب سے بڑی وجہ یہ ہے کہ اس شہر نے اپنے دور اندیش لیڈر ساتھی نہال احمد صاحب کی قیادت پر مکمل اعتماد کیا اور اس غیر فرقہ پرست قیادت کو طاقتور بنایا. ساتھی نہال احمد صاحب نے بھی اپنے ورکروں اور شہریان کے اعتماد کو ٹھیس نہیں پہنچائی. نہال صاحب اپنی پوری سیاسی زندگی میں فرقہ پرستی کے خلاف رہے. کبھی فرقہ پرستوں کے آگے سر نہیں جُھکایا. ہمیشہ فرقہ پرستی کا سَر کُچلنے کا کام کیا. نہال صاحب کا سوشلسٹ و غیر فرقہ پرست نظریہ ہی اُن کی شان رہا. 

            ساتھی نہال احمد صاحب کے بعد بھی مالیگاؤں شہر میں جنتادل سیکولر کے لیڈروں اور ورکروں نے ہمہ وقت نہال صاحب کے نظریات پر قائم رہ کر سیاست کی. اس شہر میں واحد سیاسی جماعت جنتادل ہی ہے جو فرقہ پرستی، ظلم و ناانصافی کے خلاف سینہ سپر رہتی ہے. موجودہ ملکی سے لے کر مقامی سیاسی حالات کے تناظر میں ساتھی نہال احمد صاحب کے سوشلسٹ نظریات کو مزید مضبوطی کے ساتھ آگے بڑھانے کی ضرورت ہے. 

            جنتادل سیکولر کے قومی رہنماؤں کے فرقہ پرست بی جے پی کے ساتھ اتحاد اور این ڈی اے میں باقاعدہ شمولیت کے فیصلے سے سیکولر مزاج رکھنے والوں میں شدید بے چینی ہے. مالیگاؤں شہر میں سب سے زیادہ اس کے اثرات دکھائی دے رہے اس لئے جنتادل سیکولر کے فرقہ پرست طاقتوں کے ساتھ جانے کے فیصلے پر مقامی جنتادل ورکروں سے صلاح مشورہ کیا جانا ناگزیر ہوگیا ہے. 

               گزشتہ دنوں پارلیمنٹ کی نئی عمارت میں جاری اجلاس کے دوران دہلی سے بی جے پی کے لوک سبھا ممبر کے ذریعے ممبر آف پارلیمنٹ کُنوَر دانش علی کے خلاف انتہائی غلیظ کلمات استعمال کئے گئے. آزاد بھارت کی پارلیمنٹری تاریخ میں یہ سب سے گھناؤنی حرکت مانی جا رہی ہے. اس پر بھی شہر مالیگاؤں کا موقف ملکی سطح پر ظاہر کیا جانا ضروری ہے.

              مقامی سطح پر کارپوریشن ملکیت کا تلواڑہ تالاب بھی فرقہ پرستی کا شکار ہے. جنتادل ہی واحد سیاسی پارٹی ہے جو کئی سالوں سے تلواڑہ تالاب کے پانی کی حفاظت کے لئے تگ و دو کرتی آئی ہے. تلواڑہ تالاب کے پانی پر بری نظر رکھنے والے فرقہ پرستوں کی نظر اُتارنے کا کام جنتادل نے کس طرح کیا یہ عوامی سطح پر لانا وقت کی ضرورت ہے.

         ان سبھی موضوعات پر جنتادل سیکولر کے سبھی عہدے داروں، ذمہ داروں، ورکروں اور ہمدردوں کی ایک انتہائی اہم اور ہنگامی میٹنگ 26 ستمبر، بروز منگل رات ساڑھے نو بجے منعقد کی جا رہی ہے. یہ میٹنگ آگرہ روڈ پر واقع شانِ ہند رابطہ آفس پر ہوگی. شہر بھر کے سبھی ورکروں اور ہمدردوں سے گزارش کی جاتی ہے کہ وقتِ مقررہ پر اس ہنگامی میٹنگ میں شرکت کر کے اپنے مفید مشوروں سے نوازیں.

جاری کردہ : شانِ ہند نہال احمد (صدر جنتادل سیکولر شہر مالیگاؤں)